منتديات الأرطاوية
عدد الضغطات : 4,377عدد الضغطات : 3,405عدد الضغطات : 3,785
عدد الضغطات : 5,217
عدد الضغطات : 0
عدد الضغطات : 3,087
لطلب الاعلان التواصل مع الفوزان للحاسب الآلي البريد الالكتروني : al-fowzan1@hotmail.com / هاتف : 064422246,

العودة   شبكة ملتقى الغاط > ملتقى الغاط > الملتقى العام > الملتقى الأدبي > ديوان شعراء ملتقى الغاط

انسخ الرابط المختصر لهذا الموضوع :
 
 
LinkBack أدوات الموضوع انواع عرض الموضوع
قديم [ كُتبت : 2009-01-24 - 09:02 PM ]   رقم المشاركة : 1

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


ديـوان الشـاعر ][ عبدالعزيز بن عبدالرحمن الصعب ][

..
..

قصيـدة الشاعر عبدالعزيز بن عبدالرحمن الصعب في محافظه الغـاط




انا من ديرتن منها خوال معزي آل سعود
قرانيس السدارى مكرمين الجار والعاني

وهذي ديرتي ياهل الردى ياقليلين الفود
وهي دارن لبوي ودار عماني وجداني

قرانيس النواصر عزوتي لاحك عودن عود
سلايل حنضلين مايهاب الموت من داني

وهي ديرة خوالي عزها يوم الليالي سود
صواريم الحرار من الدواسر نسل بدراني

لجا بين الضماير حبها في كل يوم يزود
ونامتولعن في حبها من طول الازماني

وهي دار الرجال اهل الوفا واهل الكرم والجود
رجالن دونها ترخص لها الارواح وتفاني

على وقتن مضى واليوم حنا من عيال العود
تسلم واستلم واستسلمت له كل الاوطاني

على ضهور الاصايل والسيوف وريحة البارود
جراهيد الصحاري من مضارب خيله تعاني

وذلت له سلاطين العرب والعالم المشهود
بعد ماشاهدو فعل الامام بكل ميداني

وطبق شرع ربه في بلادن عزها المعبود
وصرنا تحت حكمه كلبونا ربع وخواني

وقف دون الوطن واهل الوطن في سيفه المجرود
وقوم دولته واسس قواعدها والاركاني

خزم روس الخشوم وسلطه ربي على المقرود
وصار الذيب في مفلا الغنم يرعى مع الضاني

وازال الجهل والتعليم ماله فالبلاد حدود
ومن فضله وجوده اصبح التعليم مجاني

الا يالله عسى قبره على مد النضر ممدود
وعسى الفردوس تكتب من نصيب القايد الباني

عسى الله يرحمه واللي حكمها من بعده سعود
سما باسم البلاد سعود وصار الحاكم الثاني

وتولاها شهيد العصر فيصل ناصر المضهود
حماها واحتماها الفيصلي من كل قوماني

وخرت له جبابرة اليهود وحقق المنشود
فرض رايه على كل اليهود وكل نصراني

وعز الشعب خالد يوم خلا للبلاد وجود
وصارت دولة التوحيد في عهده لها شاني

وتسلمها فهد لين اصبحت في غاية المقصود
صليب الراي فكاك النشايب مرهب الجاني

واطال الله بعمر الحاكم اللي فالبلد موجود
ملكنا اللي ملك كل القلوب بطيب واحساني

ملكنا اللي ومره الله علينا يبذل المجهود
ولاساوم على الاسلام حاور كل الادياني

وعاش اللي حمى حدود الوطن والمسلمين رقود
ولي العهد ابو خالد قوي الباس سلطاني

دفع ماله على اليتمان واللي دخلهم محدود
يبي رد العوض من خالق الدنيا والاكواني

وحنا كلبونا للمليك وللبلاد جنود
توحدنا على اسم موحد الدوله كحيلاني

وعدد مالاح برق وعد ماهبت رياح النود
صلاة الله على خير البشر من نسل عدناني

 
قديم [ كُتبت : 2009-01-24 - 09:08 PM ]   رقم المشاركة : 2

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..

قصيدة الشاعر عبدالعزيز الصعب إهداء إلى الفاضل / فهد بن عبدالله اليحيى


يقول من صاغ المثايل والاشعار
وهيض من المكنــون شين طـــراله

وخلى الفكر في نضم الابيات يندار
بابيات من هاجس ضميره جــزاله

سلام يامن له على القلب تذكار
اللـــي على قلبي تمركز لحـــــــاله

انتم خوالي ياطويلين الاعمار
وابــــوي جدك يافهد من خوالــــه

خوالي اليحيى بعيدي الانضـــار
اولاد زايــد كاسبين الشــكاله

نطاحة العايل وحمـــاية الــــدار
كم من خصيمن يتموا له عيـــاله

فرسان بالميدان زلزال واعصار
وقت الصمـــايل محتمين الطواله

لثارت الهيجا وبـــارودهم ثــار
يومن علــــى العدوان قرب زوالـــه

لـــي الفخر واقولها ســروجـــهار
فعل الدواسر بالجزيره لحــــاله

عوق الخصيم مهيبة كل مغوار
خوالي اهل الطيب واهل الجماله

وارجع لبو عبدالله الصاحب البار
هو راس مـــالي يو م انا راس مــاله

رفيقي اللي له معزه ومقــدار
سمح المحـــيا وافيـــاتن خصـــــــاله

وجودكم بالملتقى يابن الاخيار
ماكنه الا بـــارقـــن فـــي خيـــــــاله


واستر بالي وصار لي شي ماصار
ونضـــم القصيــده خيـــر واكبر دلالـــــه

 
قديم [ كُتبت : 2009-01-24 - 09:16 PM ]   رقم المشاركة : 3

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..

قصيده مهداه إلى من يعز عليه الغاط

( حـر السـدارى )



الغاط له عندنا قدر(ن) ولـــــه قــيـمه
يقوله اللي على عشانه سخر قــــــافه

الشعر في حضرته زانت تراجيمــــــــه
دار(ن) بها عاشوا الاجـــداد باكنـــــافه

والله احـبـــــه بعد واحــب اقاليمه
واحب كل الديار اللي على اطـــــرافه

يعجب عقول البشر في حسن تنضيمه
خـــسران يـــاواحد(ن) ماجا ولاشافه

من دونه طويق حاويته مراجيـــمه
محد(ن) بجـاهل بضلع طــويق واوصــــافه

من ماضي الوقت شامخت(ن) تعاليمه
من لاذ به عن لهيب الـــلال مـــالافه

لولا المحافض مازان وزان تصميـــــمه
ابدع وخطط عليـــــه وقام باشرافه

امير فيه الوفا والطيب والشيمه
حــر السدارى نهض في راس مشــرافه

في كل محفـــل يشرفنا بتكــريمه
عــــبدالله الناصر الثــــابت بمــــيقــــافه

يشبه لنو(ن) حقاقه في مقاديمه
غيث(ن) بخيره طلع بالغـــــاط واريــافه

يالله انا طالبك تحسن خواتيمه
اللي نهج مـــنهجه من مــنهج اســلافه

 
قديم [ كُتبت : 2009-01-24 - 09:22 PM ]   رقم المشاركة : 4

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..


لما لـ الغـاط من مكانه في نفوس محبيـه

قصيدة الشاعر / عبدالعزيز بن عبدالرحمن الصعب في محافظة الغـاط



ايوالله اني احب الغاط وترابه
من يوم انا ورع نفسي فيه مفتونه

اموت واحيا على شانه وباسبابه
وياناس واحد يحبه لاتلومونه

واللي يحبه عسى الجنه لمن جابه
واللي يسبه عسى باهله يعزونه

وحبيت انا الغاط من حبي لشيابه
شيابنا اللي حموه وكانوا حصونه

وان شفت شايب يزيد بقلبي اعجابه
اقبل ايدينه الثنتين ومتونه

ذولاك ربعن لبوي وكانو اصحابه
من قلبي الحب والتقدير يحضونه

عاشو بوقتن زمانه كشر بنابه
اقبل عليهم يحد الفقر بسنونه

والكل منهم وقف دونه بمشعابه
وان غاب واحد عن الاخر يسدونه

اللي حموا حشمة المسجد ومحرابه
والجار لو جار فيهم مايخونونه

حداني الوقت عنه وقفت اركابه
بس اتنشد عن اللي جاه وش لونه

هو درتن وسط نجد ونجد تزهابه
ياكثر ماشفت لي ناسن يزورونه

من حد راس النفود لخشم حطابه
وطويق منقاد من خلفه ومن دونه

ربعي هل الغاط هم للطيب كسابه
من ماضي الوقت والعربان يلفونه

وربعي هل الغاط دون الحق طلابه
كم فارسن شاف حر الموت بعيونه

وربعي هل الغاط فزاعه وحرابه
على حياض المنايا الموت يردونه

وربعي هل الغاط فكاكه وغلابه
نهار عصر الهنادي فيه مسنونه

وربعي هل الغاط للضيفان رحابه
مع هبة الريح فنجالن يسوقونه

بيت الكرم عندهم ماسكروا بابه
في وجه من جاه ربعي مايصكونه

يقوله اللي نضم قافه وغنابه
وعلى الوتر يابدر لازم تغنونه

 
قديم [ كُتبت : 2009-01-24 - 09:27 PM ]   رقم المشاركة : 5

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..


قصيدة الشاعر / عبدالعزيز بن عبدالرحمن الصعب موجّهه إلى الفاضل / سلطان اليحيى



يالحون الشعر غني في نضم زين المثايل
والشعر لابد ما نرفع لبو يحى شعاره


ويالحون الشعر طيبي لجل محمود الخصايل
شاعر(ن) مغنم ومكسب للشعر واكبر تجاره

شاعرن لاهاج جاشه مايدور له حلايل
واحدن مثله معه بالشعر رخصه واستماره

ياهلا يامرحبا واعداد براق المخايل
كوكبن ضمن الكواكب ماتغير عن مساره

طيب السيره رفيع الذات كساب الجمايل
ماتراجع واحدن مثله ليا صدر قراره

قدها وقدود لاجات الحقايق والصمايل
انت ياسلطان خالي مثل خالي باعتباره

ياذرى من جاك عاني عن لواهيب القوايل
وارثن طيب الرجال اهل الكرم طيب وسماره

اشهد انك حر دايم بارزن فوق الطوايل
وكل حرن في مكانه ماجهل ماكر حراره

انتم اللي تشعلون النار في روس الفتايل
يوم حزات النشايب والدواسر بالصداره

قلتها واعيدهاوعندي لها شهود ودلايل
فعلكم مشهود دايم بالشجاعه والضفاره

فزعة الفزاع والمرتاع من عصر الاوايل
والدلال مهيًله للمعتدي نار وشراره

والدواسر فعلهم مذكور من بد القبايل
هم خوالي وافتخر دام الفلك داير مداره

والسموحه كان قصرنا على نضم المثايل
وحقكم حبة خشم ياخال في وقت الزياره

 
قديم [ كُتبت : 2009-01-24 - 09:32 PM ]   رقم المشاركة : 6

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..

قصيدة الشاعر / عبدالعزيز بن عبدالرحمن الصعب موجهه إلى سمير الحمدان العضيدان ( شمال سدير )



لاوالله الا شمال سدير سواها
ثبت مواضيع ابو غاده وسجلها

وقصيدة الملتقى عنده تبناها
من حسن ذاته بعد جاته تقبلها

الشاعر اللي بحور الشعر عداها
وافعاله الطيبه بانت من اولها

ماراح عنها ولاقفى وخلاها
اشرف عليها ونسقها وكملها

والله يلولاه ماتزهى بمعناها
ولولاه مانالت وحازة معدلها

بانت فعول الرجال وبان مبداها
نقوة رجاجيل اقدرها واجللها

له وافي الشكربأولها وباتلاها
والشكر موصول للاعضاء وناقلها

 
قديم [ كُتبت : 2009-01-24 - 09:43 PM ]   رقم المشاركة : 7

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..

قصيـدة إهـداء إلى الأديـب / عبدالله إين ادريس



ابدا بذكرالله المعبود سبحانه
الواحد اللي علشانه نصلي له

ومن بعد ذكره نضمت القاف والحانه
وعليه سقت المثايل لين تمشي له

بابيات شعرن من الهاجوس طربانه
تطرب هل النضم والمسحوب والشيله

من شان شيخن مسويها على شانه
شيخن سمى بالمعالي ماثنى حيله

عبدالله الدريس غيثن هل هتانه
ياما وردنا وشربنا من مناهيله

وعبدالله الدريس من قلبه وشريانه
عدن على جمته تشعب محاحيله

وعبدالله الدريس عودن فاح دخانه
رمز الكرم مثل حاتم مايجاري له

له بصمتن بالشعر من ماضي ازمانه
فطاحل الشعر تقرا له وتروي له

الى تهيض ضميره ثار بركانه
يبني بيوتن تهز العقل وتهيله

كل القصايد مسجلها بديوانه
ماحطها عند فنانن يغني له

انشهد انه زعيمن له وسلطانه
من يوم ماكان في عصره وفي جيله

رجلن مقامه رفيع وعالين شانه
حرن على قمة العليا مداهيله

من ساس جده وابوه اصيل معدانه
من ماضي الوقت والتاريخ يحكي له

واليوم جاني خبر بيته وعنوانه
من واحدن عندنا بالفصل يدني له

حفيده محمد حزامه ونيشانه
مواري الطيب بافعاله واقاويله

ابنصحه حيث انا من حسبة اخوانه
نصيحتن وافيه من شخص وافي له

ابوك حذراك من هجره وعصيانه
جزاه ماتلحقه مهما تسوي له

وابوك معروف منزاله ومسكانه
ان كنت نشمي تبي تاصل مواصيله

اللي ورث طيب جدانه وعمانه
واجب عليك الكلام الزين تبدي له

حافض على حق جيرانه وضيفانه
زرعن زرعته تبي تجني محاصيله

وعند الرجاجيل خل النفس ريحانه
لاتصير ثرثـــــــاتن كلن تهــــذري له

واحرص على واجبات الدين واركانه
واحرص على العلم يامحمد وتحصيله

العلم مركب سفينه وانت ربــــانه
واصل على رحلته مادمت هاويله

والعلم نورن يشع الكون ضيـــانه
والا الجهل مايشع النور قنديله

والعلم ترفع بيوت العز عمدانه
والا الجهل مايسرك يوم تبني له

اطرد ورى العلم لو بالصين ميدانه
لاتثني الساق من دونه وترخي له

ولاتتبع مطاوعن نفسه وشيطانه
لو دق زيره وغنى لك مواويله

دايم تحصل عيوب الناس بلسانه
نمام لاجاه واحد قام يشكي له

جنب طريقه رفيق السوء واعوانه
كم واحدن قام يفتلٌه ويطوي له

ان جاه رجال عاقل صك بيبانه
شخصن مثل هالنمونه لاتباري له

ونا بعد مانضمت القاف والحانه
ارجو السموحه ليا قصرت في قيله

 
قديم [ كُتبت : 2009-01-24 - 09:48 PM ]   رقم المشاركة : 8

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..


راع النوايـــا


الا يالمزنه اللي سيلها حدّر مع الشعبان
بامانه ماتشوفين الذهيب اللي غدى تالي

غدة فيه الضوامي والوحوش وهيبة السرحان
وتاه وضاع والاقدار بامر الواحد الوالي

سرى مسرى الجريح بليتن فيها القمر مابان
ولاادري وين غادي له ثلاث ايام وليالي

بعد عيد الضحيه واختلاف الوقت والازمان
وصلني علم كنه حلم مايطري على بالي

بلاني لاجزاه الله بخير سخّيف الذرعان
واثر راع النوايا قام يومي بي على الجالي

اشوم النفس عن بعض الاوادم والعن الشيطان
ردي النفس هذا مذهبه من بين الازوالي

وانا وش حيلتي باللي هفى في مركب النقصان
لعلّه لاهفى ماعاد يرجع هافي الخالي

وانا طبعي اجازي راعي الاحسان بالاحسان
ولا ارضى بالخطا لو الخطا من واحدن غالي

عسى من جاه واخلف نيته عند العرب ينهان
اهانة واحدن في مجلسه من كف رجالي

يجيني بالّحيل لامن حضر والكذب والبهتان
يخاف من الليالي ماتوافق وضعه الحالي

احشمه عن كلامن يجرح الاعصاب والابدان
ولاارضى انه يخاطبني بخوف وذل واذلالي

يقول ادمح خطاي ولاتحاسبني وانا غلطان
ودخُلني على الله مـ الٌحقه بالقيل والقالي

يسابق نضرته دمعن يجرُح صافي الاوجان
وخشع قلبي على ذيك الدموع اللي برة حالي

ولاجازيته الا بالرضا واللي مقدر كان
ونسيت اللي حصل ماكن صار ولاتهيّالي

والا يابدر ابن ناصر تلوم العاشق الولهان
ونا خابرك ما تشره علي ياطيب الفالي

وتمت يابدر وختامها بالمسك والريحان
على حضرة جنابك وانت قدرك عندنا عالي




 
قديم [ كُتبت : 2009-01-24 - 09:55 PM ]   رقم المشاركة : 9

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..


قصيده بـ عنوان ( بمن نفتخر ياعرب )



الا ياالله طلبتك ياالاله الواحد المنَان
طلبتك وانت ربي مالك الدنيا وخالقها

تجنبنا الخطر من دولة اهل الفسق والعصيان
بني صهيون فوق ارض العرب ترفع بيارقها

بجاهك ياولي العرش دمّر زمرة الشيطان
بحيلك ياقوي الحيل من سجيل تحرقها

يهودن حاصرت غزٌه وشبّو بأرضها النيران
خنازير اليهود الغاصبه عيّت ـتفارقها

ودبابات من روس المدافع تقصف البنيان
وصواريخ(ن) توجٌهّا على العزّل وتطلقها

ضحاياها من الاطفال والشياب والنسوان
هدفها بالحياة القتل والارواح تزهقها

وعساها للبلاوي والمصايب ياعضيم الشان
وعن ضعوف العرب يارب تشغلّها وتقلقها

لها خمسين عام مهيّمنه بالجرم والطغيان
خريطتها على راس العلم جايز تطبقها

خريطه صمموها الانجليز بحضرة الالمان
وثيقه من وعد بلفور حرَرها وصدَقها

وتدعمها فرنسا والسويد ودولة الطليان
تبي بارض العرب دوله يهوديّه تحقّقها

فلسطين الجريحه دمّها ينزف من العدوان
وشجعان العرب وشلون ماثارت بنادقها

عزانا في أبي بكرو وعمر مع صاحبه عثمان
وعلى اللي فوق خيبر راية الاسلام علّقها

صحابي هدَم حصون اليهود وحطم الاوثان
وقطع روس اليهود اللي تخبّت في خنادقها

وعزانا بقايدن جاها على رمح وقنا وحصان
براثنت اليهود بمعركة حطّين فرّقها

صلاح الدين سيّرها مع الابطال والشجعان
وحرًَرها بعد ماقطَع الهدنه ومزَقها

جيوش المسلمين الاوّله من خيرة الفرسان
هدفهم كلمة التوحيد كل الناس تنّطقها

على حب الشهاده ماتساوم تدحم الميدان
تبيع اعمارها وارواحها للخلد تسبقها

وحنا الله ومرناوالرسول بطاعة السلطان
وهذا حق واجب بيعة الحاكم نوثّقها

وحنّا مع ملكنا في بلدنا نحفض الاوطان
نعّز بلادنا والامن سايد في مناطقها

وحنا مانطالع في كلام الناس مهما كان
على شاشاتهم ماتحسن الكلمه ومنّطقها

سنة تسعين ميلادي ضهر حقد اللحسود وبان
لقينا الجارحوّل فوق جيرانه ويسرقها

بعدها وجه جيوشه علينا من ورى دسمان
وعرفنا اللي نصادقها من اللي مانصادقها

لقيت اللي تمجد مثل هذا هافي الجدّان
وعدوان السعوديه تموت ابّها وتعّشقها

الا ياهل العقول الفاهمه قوموا على السفهان
ترى درب الرشاد اخير من علمن يضايقها

 
قديم [ كُتبت : 2009-01-25 - 12:19 PM ]   رقم المشاركة : 10

شاعر و مشرف سابق



رقم العضوية : 345
المشاركات : 2,800
شكراً : 0
تم شكره : 0 مرة في 0 مشاركة

شمال سدير غير متصل


رد: ديـوان الشـاعر ][ عبدالعزيز بن عبدالرحمن الصعب ][

..
..

قصيدة الشاعر / عبدالعزيز الصعب مهداه إلى الفاضل / سلطان بن محمد الراشد



الا يا بدر قم جمع من(الارطا)وشــب النار
وخلك في مكانك لا تجيني تشغل أفكــــاري

تأخرلك شويه خل أبوك يهيًض الافكـــــــــار
بلا والله حروف الشعر في صدري لها طـــــــاري

بعد هلت علينا المزنه الغرى من الامــــــطار
وعلى كل الشعاب الي تمره سيلها جــــاري

وانا في جوها قمت اتذكر ربعي الاخيــــــــار
رجاجيل(ن) تسليني ليا طولت مشـــــــواري

وابختار الصحيب الي معي دايم وفي وبــــار
هذاك الي فرض حبه علينا غصب واجبـــــاري

مثل(سلطان)ما نعجز علـى مدحه ولا نحتار
ولولا صاحبي(سلطان)ماهيضت الاشعـــــاري

عريب الساس ما ينداس لـه حشمه وله مقدار
وله بين الحنايا صاحبي مارد ومصــــــــداري

انا ماشفت مثلك بالقرايب يا رفيع الكـــــــــــار
عسا ربي يجنبكم طريق(ن)فيه الاشــــراري

اعزك مثل ماعز النبي اصحابه الانصــــــــــــار
اقوله وانت مايجهلك قولي يابن الاحــــــــــراري


 
 

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
تغطية زيارة امير منطقة الرياض صاحب السمو الملكي الامير خالد بن بندر بن عبدالعزيز أيمن العامر ملتقى الغاط 3 2013-05-06 01:45 PM
مجلس الشورى وصوت الشعب just a person إثراء الفكر للحوار الهادف 4 2013-04-09 06:51 AM
تقديم دفعة قروض جديدة من الصندوق العقاري أخبار الصحافة أخبار أهالي الغاط 3 2012-09-17 12:27 AM
صورة نادرة لـ ( آل سعود ) ..! محمد الحصين حول العالم 0 2012-07-25 10:51 PM


الساعة الآن 11:51 PM.

ملتقى الغاط

↑ Grab this Headline Animator

خــريــطــة: الــمــوقــع



جميع وجهات النظر المطروحة في ملتقى الغاط لا تمثل الا اصحابها